Xixón acueye’l 22 de setiembre una nueva grabación d’Amosando, ciclu de conciertos en formatu íntimu, grabaos y emitíos per Internet qu’entama musicasturiana.com. La primer edición abriéronla L-R y Xaime Martínez y, tres l’éxitu algamáu -casi 30.000 reproducciones ente los videos publicaos en YouTube y Facebook-, el 22 de setiembre va haber un nuevu conciertu/grabación con Ún de Grao y D’Urria.
Ún de Grao presenta ‘Pelo Segao’, primer llarga duración d’esti veteranu artista de la escena folk onde reinterpreta pieces de tonada y d’otres músiques de raigañu asturianu pa empobinales hacia soníos propios del rock, del jazz o de la bossa nova. Tradición y vanguardia con un estilu personal que fai que cada cantar suene contemporáneu dafechu.
Dende Vil.lablino (Llión) aporten D’Urria colos cantares que dan forma al so debú ‘En Ca Pla’. La música tradicional d’un llau y otru d’El Cordal siéntese nes composiciones d’esti cuartetu qu’usa nes sos lletres la variante dialectal del asturianu conocida como pal.luezu. Una de les grandes sorpreses musicales d’acuyá del payares.
Próxima edición en payares
En payares va tener llugar la última edición d’Amosando 2019, esta iniciativa novedosa pa sofitar la música asturiana, que bebe d’esperiencies exitoses n’otres partes del mundu y que ta adaptada a les actuales formes de consumir y promocionar la música. L’eventu ta entamáu pola tienda online y distribuidora dixital musicasturiana.com, grabáu pol realizador Javier Lueje nos sos estudios de Xixón, producíu por Goxe Producciones y patrocináu por Xixón Turismu y por Caxa Rural d’Asturies.