Amosando, el ciclu de presentaciones de discos entamáu por musicasturiana.com, entama’l 16 de marzu en Xixón col conciertu/grabación de L-R y Xaime Martínez.
L-R ye’l dúu post-folk formáu polos renomaos músicos Rubén Bada y Leticia Baselgas. El so estilu únicu ye una reellaboración de la música asturiana calteniendo los ritmos tradicionales pal baille pero incluyendo soníos como’l blues, jazz o rock. Nel so primer trabayu discográficu, ‘Post-Folk-Asturianu‘, axunten voz, pandereta y guitarra elléctrica en trece pieces.
Xaime Martínez ye’l proyectu en solitariu del cabezaleru de La Bande que caleya pel pop anglosaxón, el folk estaunidense, la música alternativa y la tradicional asturiana. Nel CD-Llibru ‘Ósculos d’Agua Nel Imperiu Asturianu‘, los testos y les illustraciones texen una revisión irónica, crítica y personal de la hestoria d’Asturies al traviés de dellos de los sos personaxes.
Continuación en 2019
Otres cuatro actuaciones/emisiones por anunciar van ser la continuación nel 2019 d’esti ciclu entamáu pola tienda online y distribuidora dixital musicasturiana.com, grabáu pol realizador Javier Lueje nos sos estudios de Xixón y producíu por Goxe Producciones. La primera d’estes emisiones ta patrocinada por Xixón Turismu, por Caxa Rural d’Asturies y por Borines Selección d’Agua de Borines.