Amosando, el ciclu de presentaciones de discos entamáu por musicasturiana.com, continua’l 28 de xunu col conciertu/grabación de Silvia Quesada y Cerezal.
Cerezal ye una banda formada por xente veterano de la escena folk d’Asturies. ‘La Cereza’l Cielu‘ ye’l so segundu trabayu, un discu qu’entemez folk, pop, rock y incluso electrónica, llevando a la música de raíz tradicional a nueves sonoridaes.
Silvia Quesada -cantante que formó parte de Los Gatos del Fornu y Tejedor- presenta ‘Prefiero Ver Llover‘, la so segunda referencia discográfica en solitario na que’l so soníu evoluciona hacia una propuesta pop mui cuidada y completa.
En Toma3
La llibrería-café Toma3 de Xixón va acoyer esta grabación a les 17.00h del domingu 28 de xunu. La entrada ye de baldre pero’l so aforu ta llendáu a les persones que ganen una invitación participando nun sortéu al traviés de les redes sociales de la tienda online y distribuidora dixital musicasturiana.com, organizadora del eventu xunto col realizador audiovisual Javier Lueje y Goxe Producciones. Ta patrocináu por Xixón Turismu y pola Fundación Caxa Rural d’Asturies.