Amosando, el ciclu de presentaciones de discos entamáu por musicasturiana.com, continúa el 6 de setiembre en Xixón col conciertu/grabación de Felpeyu y Fruela 757.
Felpeyu ye ún de los grupos más importantes de la música asturiana. Lleven cuasi 30 años reellaborando los sones tradicionales d’Asturies al traviés del so estilu folk acústicu y atlánticu. Con conciertos en 14 países y 4 continentes, a finales de 2017 asoleyaron el so quintu discu ‘Cerquina‘, un trabayu esquisitu que da un pasu más nel procesu de recuperación y dignificación de la nuestra cultura.
Fruela 757 ye una de les propuestes más orixinales de la música’l país. Nel so repertoriu suena Reggaetoná, Hipfolk, DrumAmbás… o lo que ye lo mesmo, música popular asturiana amestada a los soníos urbanos internacionales del sieglu XXI. ‘Llariegu‘ ye’l so nuevu y sestu trabayu, qu’homenaxea al pop llariegu al traviés d’electrónica y otres músiques contemporánees pa la danza.
Continuación en 2020
Otres dos actuaciones/emisiones por anunciar van ser la continuación nel 2020 d’esti ciclu entamáu pola tienda online y distribuidora dixital musicasturiana.com, organizadora del eventu xunto col realizador audiovisual Javier Lueje y Goxe Producciones. Tien el patrociniu de Xixón Turismu y de la Fundación Caja Rural de Asturias.