Una iniciativa novedosa, influyía por esperiencies exitoses notres partes del mundu y adaptada a los vezos actuales de consumir y promocionar la música
Una mezcla ente un conciertu acústicu con aforu reducíu, un programa de televisión y un alderique; too ello retresmitíu per Internet pa que llegue a más persones de tol mundu. Asina ye Amosando, el ciclu de presentaciones de discos entamáu por Musicasturiana.com.
Un proyectu pa visibilizar a la música asturiana dientro y fuera de les nuestres fronteres; una ferramienta promocional adaptada a los vezos actuales de consumir música; una iniciativa pionera n’Asturies influyía por otres esperiencies asemeyaes exitoses notres partes del planeta. Éstes son les característiques coles que naz Amosando pa intentar valtar ún de los más grandes problemes que tien la música asturiana: la poca promoción.
D’esta manera, Amosando nagua por ufrir daqué orixinal y atractivu, con un formatu nel que los artistes van tocar los cantares del so discu más nuevu énte un público reducíu que va poder preguntar y aldericar col artista en vivo, p’asina fomentar la cercanía y interrellación ente los músicos y los sos siguidores. Los conciertos van grabase, van emitise en formatu audiovisual per Internet y van promocionase activamente al traviés de les redes sociales pa que se puean ver dende cualquier llugar del mundu.
Amosando 2019
En 2019 va haber seis actuaciones/emisiones d’esti ciclu entamáu pola tienda online y distribuidora dixital Musicasturiana.com, grabáu pol realizador Javier Lueje nos sos estudios de Xixón y producíu por Goxe Producciones. La estaya de Turismu del Ayuntamientu de Xixón y Caxa Rural d’Asturies patrocinen esta iniciativa.